ILOILO CITY – Plano sang Metro Iloilo Water District (MIWD) nga pasakaan sang kaso kriminal kag administratibo si Mayor Jose Espinosa III sa pag-appoint sang bag-o nga set sang Board of Directors sang MIWD.
Sa interview sang Bombo Radyo, ginpahayag ni Atty. Roy Villa, corporate legal counsel sang MIWD, maathag nga imbalido ang pag-appoint sang alkalde sang Board of Director tungod naga-exist kag wala pa sang vacancy sa MIWD Board.
Ginakilala gihapon sang MIWD suno kay Villa ang mga miyembro sang Board nga gin-appoint ni Gov. Arthur Defensor Sr.
Paglapas sa Presidential Decree 198 suno kay Villa ang ginhimo ni Mayor Espinosa, sa diin ini mismo ang nag-nominate, nagdetrminar sang vacancy kag nag-appoint sang mga miyembro sang Board.
Dugang pa ni Atty. Villa, ang legal nga miyembro sang Board of Directors sang MIWD amo sanday Dr. Teodoro Robles nga chairman, Atty. Juanito Acanto nga vice chairman kag members nga sanday Ramon Cua Locsin, Jessica Salas kag Atty. Josephine Caram.
Kalakip naman sa mga gin-appoint ni Espinosa sanday Felicito Tiu sa business sector; Rebecca Maravilla sa womens sector; Dr. Rey Celiz para sa Civic Oriented Services; Architect Antonio Sangrador para sa Professional Association; kag Ronald Raymond Sebastian para sa Education.
Apang ginpanindugan ni Mayor Jose Espinosa III nga nasantu sa desisyon sang Supreme Court ang iya pag-appoint sang Board of Directors sang Metro Iloilo Water District.
Sa interview sang Bombo Radyo, ginpahayag ni Espinosa nga base sa pahayag sang Korte Suprema, kun sala ang appointing authority, tanan nga posisyon ang mangin bakante tungod void na sa una pa lang ang nag-appoint sini.
Apisar suno sa alkalde nga wala nadala ang siyudad sang Iloilo sa desisyon sang Korte Suprema sa kaso sang Cebu, pareho lang ang sitwasyon kag applicable man sa Iloilo ang amu nga desisyon.
Gin-ehemplo ni Espinosa ang natabo sa Tacloban City, sa diin wala man sila nadala sa desisyon apang sa subong gin-confirm na sang Local Water Utilities Administration (LWUA) ang bag-o nga miyembro sang Board of Directors nga gin-appoint sang siyudad sang Tacloban.
Tungod sini, nagalaum si Espinosa nga mangin kaangay man ang siyudad sang Iloilo sa Tacloban City rason nga nag-appoint siya sang bag-o nga set sang board of directors sang MIWD agud indi siya maakusaran nga wala nagahimo sang katungdanan.