ILOILO – Wala na nagpahilabot pa si Calinog, Iloilo Mayor Francisco Calvo sa indi pag-intindihanay sa tunga sang League of the Municipalities of the Philippine – Iloilo Chapter kag sang anay Schools Division Superintendent sang Probinsya sang Iloilo.
Ini matapos nag-file sang petisyon sa Department of Education ang 34 ka mga alkalde sa Probinsya sang Iloilo agud kakson si Dr. Ma. Luz De Los Reyes bilang Schools Division Superintendent sa probinsya sang Iloilo sa katungdanan bangud sa ginapahayag nga “arogante” kag “matinaas-taason” ini.
Sa interview sang Bombo Radyo kay Calvo, iya ginpahayag nga nangin maayo ang relasyon niya sa superintendent bangud nagabuligay ang mga ini para sa kaayuhan sa sektor sang edukasyon.
Suno kay Calvo, nagtawag si San Enrique, Iloilo Mayor Rosario Mediatrix “Trixie” Fernandez nga amo man ang presidente sang League of Municipalities of the Philippines- Iloilo Chapter agud magpirma sang petisyon, apang, mas ginpili sini nga indi nalang malakip sa petisyon.
Matandaan nga Mayo 15, 2023 sang ginmando ni Department of Education Undersecretary Atty. Revsee Escobedo ang pagkakas kay De Los Reyes sa katungdanan kag ginbalik liwat bilang Division Superintendent sang Division of Iloilo City.
Samtang, nagdepensa naman si De los Reyes nga na-misinterpret lamang ini sang League of Municipalities of the Philippines – Iloilo Chapter sa iya nangin panabat kag pamatasan.
