LEGANES, ILOILO – Limitado lamang ang resources sang Local Government Unit sang Leganes, Iloilo kun quarantine facility ang pagahambalan.
Ini ang sabat ni Mayor Vicente Jaen II sa reklamo sang pamilya sang pila ka Overseas Filipino Workers kag Locally Stranded Individuals nga naka facility quarantine sa nasambit nga banwa.
Sa interview sang Bombo Radyo kay Jaen, iya ginpahayag nga ang quarantine facility ang napahamtang na sa subong sa likod sang covered gym kun sa diin ang pito ka tawo ang nagagamit sang isa ka banyo nga mas manubo sa 1:10 nga ratio nga aprobado sang Department of Health.
Sang yara pa sa Leganes Central Elementary School ang quarantine facility, may yara sang banyo ang tagsa ka kwarto rason nga mas kumportable ini para sa mga repatriates.
May kaangtanan sa kahangawa sang pamilya tuhoy sa sharing sang Comfort Room, ginpahayag ni Jaen nga ‘clean as you go’ ang ginapatuman apang kun maluyag ang mga repatriates nga sa balay na lang magpaidalom sa quarantine, wala man ini sang problema.
Sa pagkamatuod suno sa natungdan, may yara man sang naka-assign nga manuglimpyo sa bug-os nga quarantine facility.
