ILOILO CITY– Dismayado si Iloilo City Mayor Jerry Treñas sa iresponsable nga lihok sang Bureau of Fire Protection Regional Office paagi sa pagtago nga may yara sang personnel nga nagpositibo sa Coronavirus Disease 2019 (COVID-19).
Sa interview sang Bombo Radyo kay Treñas, iya ginpahayag nga dismayado siya bangud ginpahanugutan pa nga magtinir sa opisina ang personnel nga makabig Locally Stranded Individual gikan sa Cebu.
Suno kay Treñas, may mga impormasyon pa nga nagpaliwa-liwa sa Iloilo River Esplanade ang nasambit nga personnel.
Ginahitso na niya subong suno kay Treñas ang complaint letter nga igapasa sa Inter-Agency Task Force kag magapaguwa naman sang executive order ang alkalde nga magamando sang lockdown sa talatapan sang Bureau of Fire Protection kun sa diin indi mahimo nga makaguwa ang mga personnel para sa quarantine kag ipaidalom man sa Polymerase Chain Reaction test.
Samtang, nagpaguwa naman sang memorandum order 159 ang natungdan pinaagi kay Liga ng mga Barangay Presidente Irene Ong nga nagamando sa mga opisyal sang barangay nga ipatuman ang istrikto nga home quarantine sa mga Locally Stranded Individuals kag sa mga repatriated Overseas Filipino Workers.
