Ginakabig ni Iloilo City Mayor Jerry Treñas nga delay ang Christmas Gift sang Department of Public Works and Highways (DPWH) Region 6 nga pagbukas sang full capacity sang Ungka Flyover sa Pavia, Iloilo.
Sa interview sang Bombo Radyo kay Mayor Treñas, iya ginpahayag nga nakatalana nga liwat sila magasapol ni DPWH 6 Regional Director Engineer Sanny Boy Oropel agud istoryahan man ang iban nga mga proyekto lakip na ang Ungka Flyover.
Suno kay Treñas, kinahanglan nga i-remind ang mga ahensya bangud importante ini nga mga proyekto para sa mga pumuluyo.
Ginpahayag man sini nga duha na ka tuig kontani nga nagamit sang publiko ang Ungka Flyover kon wala ini na-delay.
Gin-athag man sang alkalde nga naintindihan niya ang mga pagpanghangkat nga naatubang sang DPWH 6 apang may mga time frame nga dapat sundon.
