ILOILO CITY – Nagalaum si Mayor Jerry Treñas nga ideklarar sa labing madali nga tion ang ESQ ukon Exit Sa Quarantine sa bug-os nga syudad sang Iloilo.
Ini ang nangin sabat sang alkalde may kaangtanan sa pagpaidalom sa syudad sang Iloilo sa General Community Quarantine umpisa Mayo 16.
Sa interview sang Bombo Radyo kay Treñas, iya ginpahayag nga kun siya lang ang pamagkuton, luyag na niya nga mauntat na ang paglapta sang virus apang bangud nga yara sa gihapon ang quarantine, kinahanglan nga sundon ang basic protocol.
Suno kay Treñas, umpisa sa Mayo 16, magabukas na ang pila ka negosyo kasubong sang pawnshops, financing companies, merkado publiko apang sirado sa gihapon ang mga bar kag restaurant kun sa diin ginadumili-an ang pagbaligya sang makahulubog nga ilimnon.
May kaangtanan naman sa transaksyon sa Iloilo City Hall, ginpahayag sang alkalde nga amat-amat na nga magadamo ang workforce agud nga mapadasig man ang paghatag sang serbisyo.
May ipahamtang nga duha ka sanitation tents para sa mga magasulod sa Iloilo City Hall kag hugot nga ipatuman ang social distancing.
Magluwas diri, pahanugutan naman ang pagdungka sang barko kag fastcraft nga may byahe Iloilo-Bacolod vice versa, pahanugutan man ang pagbyahe sang pampubliko nga salakyan kag dulaon naman ang border restrictions.
Kun class protocol naman ang pagahambalan, ginatugyan na lang ini sang alkalde sa Commission on Higher Education kag sa Department of Education.
