ILOILO CITY – Ginkwestyon ni Mayor Jerry Treñas ang maayo nga panerbisyo sang National Grid Corporation of the Philippines sa Cebu kag Davao kun ipaanngid sa syudad sang Iloilo.
Ini matapos nga naeksperyensiyahan ang lapnagon nga power blackout sa sulod sang tatlo ka adlaw humalin sang Abril 27 tubtob Abril 29 sa Western Visayas.
Sa interview sang Bombo Radyo kay Mayor Treñas, iya ginpahayag nga nagakahangawa ini bangud mas nahatagan sang atensyon ang Cebu kag Davao kun sa diin wala sang problema ang ang mga ini sa power supply.
Nagakadapat suno kay Treñas nga mahatagan sang mas maayo nga serbisyo ang mga Ilonggos nga tuman ka apektado sa nagluntad nga blackout ilabi na ang mga magagmay nga mga negosyante.
Sa Biyernes, Mayo 12, natalana nga maghatag sang eksplenasyon ang National Grid Corporation of the Philippines kay Treñas sa patigayunon nga Regional Development Council-Infrastructure Development Committee meeting.
Nahibaluan nga subong nga hapon, ginkaakig sang alkalde ang indi pagtambong sa pagsinapol sang presidente sang National Grid Corporation of the Philippines kun sa diin nagpangayo ini sang pasaylo sa alkalde.
