𝗜𝗟𝗢𝗜𝗟𝗢 𝗖𝗜𝗧𝗬— Ginpaathag ni Iloilo City Mayor Jerry Treñas nga ang pagbawi sini sang propedad sang syudad sa Museo Iloilo ang isa ka pagpanigurado agud nga indi siya liwat mapasakaan sang kaso.
Ini bangud nga anay na nakasohan ang alkalde kaangot sa pagdonar sang propedad sa mga pribado nga institusyon.
Sa interview sang Bombo Radyo kay Treñas, iya ginpahayag nga may ginpatuman ang Iloilo City General Services Office (GSO) nga inventory sa Museo Iloilo agud lantawon ang sulod sang museum kag matumod ang propedad nga ginapanag-iyahan sang syudad.
Suno kay Treñas, tatlo tubtob apat na ka beses nga nagpangayo sang extension ang Iloilo Cultural Research Foundation Incorporated agud ma-delay ang pagkuha sang mga gamit kag ini ang ginpahanugutan.
Ginpahayag man sang alkalde nga konsultahon sang Commission on Audit(COA) ang mga kagamitan agud mahibaluan kun legal nga ipabilin ang mga ini, kag kun maguwa naman nga legal, pahanugutan sang city government nga ibalik sa museo ang propedad.
Para kay Treñas, wala naman sang problema sa iya kun ihatag na lang ang mga gindonar ni former Iloilo City Mayor Jed Patrick Mabilog nga kagamitan, sa diin, nagtanyag pa ang alkalde nga dugangan ang mga ini.
Nahibaluan nga ang nagligad pa nga tuig sang ginsulatan ang Iloilo Cultural Research Foundation Incorporated agud ipahibalo nga bawion ang mga gamit.
Ang Museo Iloilo ang yara subong sa pagdumalahan ni Gina Agnes Sarabia-Espinosa, asawa ni former city Mayor Jose “Joe” Espinosa III, nga ginabati-bati nga magapadalagan bilang kongresista sa syudad.
Si Gina ang utod sang asawa ni Treñas nga si first lady Rosalie Sarabia-Treñas.
Una naman nga ginpahayag ni Mayor Treñas nga ang tikang ang indi pagpamulitika bangud ginpabalo na ang Museo Iloilo antes paman natigayon nga makuha ang mga equipment.
Nahibaluan nga ang Museo Iloilo ang gintukod sang 1971 kag gindesenyo ni architect Sergio Penasales, nga ginkabig nga pinakauna nga government-sponsored museum sa Pilipinas sa gwa sang Metro Manila.
