Ginpasiguro ni Iloilo City Mayor Jerry Treñas nga ‘free from tarpaulins’ sang mga kandidato sang 2025 midterm elections ang palaabuton nga Dinagyang Festival 2025.
Sa interview sang Bombo Radyo kay Mayor Treñas, iya ginpahayag nga lakip sa ginpangkakas ang mga tarpaulins sang iya grupo nga Team Uswag agud mapabilin nga wala sang lakot sang pulitika ang annual religious activity.
Suno kay Treñas, ang tinutuyo lamang sang tikang amo ang indi mahatag sang political colors ang aktibidad ilabi na nagahilapit ang eleksyon.
Gin-athag man sini nga wala sang problema kon magpatuman sang political rally ang pila ka mga grupo kadungan sang Dinagyang Festival, basta siguraduhon lamang nga sa sagwa ini sang Iloilo City Proper.
Una na nga nagpaguwa ang alkalde sang Executive Order 167 nga may nakasaad sa pagdumili sang any political slogans kag propaganda nga naga-promote sa isa ka pulitiko.
Lakip man sa paragraph A, B, C, and D section 1 sang EO, ang pagbawal sang mga election materials kaangay sang printed kag visual materials nga may itsura kag pangalan sang mga kandidato.
