Ginsabat ni Iloilo City Mayor Jerry Treñas ang sulat nga ginpaguwa ni Iloilo City District Engineering Office Head Engineer Roy Pacanan.
Ini kasunod man sang gintawag sang talatapan nga ‘political script’ ang nagakatabo nga delay sa pila ka proyekto sa Iloilo City.
Sa interview sang Bombo Radyo kay Mayor Treñas, iya ginpahayag nga isa lang man kontani ka direkta nga sabat ang ila ginahulat sa bahin ni Pacanan kag wala na sang damo pa nga paliko-liko.
Suno kay Treñas, bilang abogado, gapamangkot lang man siya kon may budget pa gidman agud nga mapadayon ang wala natapos nga mga pasildad.
Gin-athag man sini nga indi na kinahanglan nga magpaliko-liko pa bangud update lang man ang ila luyag nga mahibaluan.
Gintumod man sang alkalde nga subong lang gid nga tinion nga nakasalapo siya sang engineer sa City District Engineering Office nga naga-intra sa pulitika.
Nahibaluan nga wala sang plano si Pacanan sa tinutuyo sang syudad nga meeting.
Patigayunon kuntani ang meeting buwas, Byernes, Marso 7, 2025.
Handa naman kontani ang alkalde nga magpamati sang bahin ni Pacanan apisar pa nga naka-persona non grata ini sa syudad.
