Nagpanawagan si Iloilo City Mayor Jerry Treñas sa Central Office sang Department of Public Works and Highways (DPWH) nga padasigon ang pagkaayo sang drainage project sa JM Basa Street, City Proper.
Sa interview sang Bombo Radyo kay Ms. Joy Fantilaga, Spokesperson ni Iloilo City Mayor Jerry Treñas, iya ginapahayag nga una nagpangako ang City District Engineering Office nga tapuson nila ang proyekto sa Disyembre 13, apang nag-request ini nga i-extend ang oras agud matapos sa Disyembre 16.
Apang, liwat nga nag-appeal ang nasambit nga opisina nga tapuson ang engineering works sa Disyembre 20, kon sa diin, para kay Treñas, wala sang ‘sense of urgency’ ang Engineering Office.
Suno kay Fantilaga, madamo sa mga pumuluyo ang apektado lakip na ang motorista sa wala natapos nga proyekto.
Ginlaragway man sang alkalde nga ‘inconsistent’ ang Department of Public Works and Highways Secretary, baliskad sa ila slogan nga “Serbisyong mabilis, building better for a new Philippines”.
Magluwas diri, ginbuyagyag man ni Fantilaga nga madamo sang reklamo ang nabaton sang opisina sang alkalde nahanungod sa proyekto.
