ILOILO CITY – Gin-ako ni Iloilo City Mayor Jerry Treñas nga wala maayo na-preparahan ang pagdugok sang tawo sa bag-o lang bukas nga Iloilo Sunset Boulevard ukon Iloilo River North Bank Road.
Kadungan sang selebrasyon sang Dinagyang Festival 2025, gindagsa sang mga tawo ang Sunset Boulevard dala ang mga salakyan kag nag-park shot.
Ginkakibot sang alkalde nga isa gid ka truck sang basura ang natipon nagikan lang sa Sunset Boulevard.
May mga botelya sang makahulubog nga ilimnon, plastic bottle sang softdrinks kag mga gallon sang tubig, barbecue sticks, putos sang chichirya, mga paper bag kag beer cups nga ginpangbilin lang sa dalan.
Sa interview sang Bombo Radyo kay Mayor Treñas, iya ginpahayag nga wala niya maantisiparan nga magluwas sa downtown area kag Iloilo Business Park, isa ang Sunset Boulevard nga kadto-an sang linibo nga mga tawo kadungan sang selebrasyon.
Gintawgan sang alkalde si Department of Public Works and Highways Region 6 Director Engr. Sanny Boy Oropel agud hingyuon sang turn over sang Sunset Boulevard sa Iloilo City Government.
Ini agud suno sa iya nga makahimo sang ordinansa ang syudad sa lugar, mapondohan ang pagbutang sang garbage bins kag pulungkuan, kag mahimuan sang pagsulundan.
Mangin ang mga tag-iya sang condominium units nga malapit sa Sunset Boulevard ang nagareklamo man suno kay Mayor Treñas bangud sa tuman kagahod sang mga naga-inom inom.
Dugang pa sang natungdan, wala problema kun madamo ang tawo sa Sunset Boulevard apang dapat dumdumon man sang publiko nga mangin responsable sa ila hulag, sa gahod kag sa mga basura sa diin mapabilin ang katinlo, kalinong kag katahom sang lugar.
