ILOILO CITY – Magapaguwa sang executive order si Mayor Jerry Treñas may kaangtanan sa panibag-o nga quarantine classification sa syudad sang Iloilo epektibo Oktubre 1.
Ini matapos nga nalakip ang Iloilo City sa mga lugar nga ipaidalom sa General Community Quarantine umpisa sa bulan sang Oktubre.
Sa interview sang Bombo Radyo kay Treñas, iya ginpahayag nga bangud ginpanubu-an ang quarantine classification sa syudad, may yara sang mga adjustment nga ipatuman kag lakip na diri ang pagbukas sang mga negosyo magluwas lang sa mga balay-ilimnan.
Suno kay Treñas, pahanugutan na ang mass gathering apang kutub lamang sa 50% capacity kag mahimo naman nga magtanyag sang dine-in services ang mga kalan-an.
Magluwas diri, igaduso naman sang COVID-19 team sa National Inter-Agency Task Force ang pagpahanugot sa flight sang mga eroplano apang may pila lamang ka pagbag-o ilabi na sa bahin sang mga pasahero.
Kadungan sini, gin-deputize naman ang mga barangay officials agud nga magbulig sa pagdakop sang mga wala nagasunod sa ginapatuman nga minimum health standards.
Nahibalu-an nga epektibo Oktubre 1, ipaidalom na sa General Community Quarantine ang syudad sang Iloilo gikan sa Modified Enhanced Community Quarantine.
