Naghatag sang abiso si Iloilo City Mayor Jerry Treñas sa mga telecommunication companies sa Diversion Road, Mandurriao, Iloilo City nga himuson ang ila linya sang mga kable.
Ini kasunod man sang ginapatigayon sang syudad nga underground cabling.
Sa interview sang Bombo Radyo kay Ms. Joy Fantilaga, spokesperson ni Mayor Jerry Treñas, iya ginpahayag nga kinahanglan nga hitsuon sang mga telco companies ang mga naga-cross nga mga kable sa Diversion Road.
Suno kay Fantilaga, parte ini sang ordinansa nga ginpasar sang 2023 bangud indi manami lantawon ang mga linya sang kuryente nga naga-cross halin sa service road padulong sa piyak nga kalye.
Tubtob Enero 16, 2025 naman ang ginhatag nga deadline sang alkalde agud himuson ang mga kable sa nasambit nga dalan.
Una na nga ginkaakig sang alkalde ang pagkadula sang internet connection sang PLDT kahapon nga adlaw, apisar nga nagpromisa ang internet provider nga i-dismantle ang ila linya kasunod sang operasyon sang Iloilo City Engineers Office.
