ILOILO CITY – Nagpapanaog sang bag-o nga pagsulundan si Iloilo City Mayor Jerry Treñas natuhoy sa travel padulong sa syudad sang Iloilo.
Ini ang magasakop sa tanan nga byahero nga ginalakipan sang returning residents, returning Overseas Filipino Workers (OFWs) kag Authorized Persons Outside Residence (APOR).
Diri kag ginamanduan man ang tanan nga byahero nga i-utilize ukon gamiton ang Safe, Swift, and Smart Passage (S-PaSS) Travel Management System.
Ang S-Pass System amo ang one-stop shop application kag communication platform para sa travelers kag magaserbe nga primary contact tracing system.
Sa interview sang Bombo Radyo kay Mayor Treñas, iya ginpahayag nga tuman ang iya pagkadismayado matapos nagtimbuok ang kaso sang COVID-19 sa syudad sang Iloilo.
Bangud man sini, nakigsapol siya sa mga gobernador sang rehiyon VI, kaupod sanday Department of the Interior ang Local Government (DILG) Undersecretary Epimaco Densing III, Bacolod City Mayor Evelio ‘Bing’ Leonardia kag Inter-Agency Task Force Region 6 agud nga maplanuhan ang uniform nga travel protocol sa rehiyon.
Yari naman ang tanan nga mga pre-travel requirement para sa tanan nga indibidwal nga magapadulong sa Iloilo City antes ang petsa sang byahe:
- Magsecure sang negative reverse transcription polymerase chain reaction (RT -PCR) test result, tatlo ka adlaw antes ang petsa sang pagbyahe;
- Magpasa sang photo ukon scanned copy sang nasambit nga negative RT-PCR test result sa Iloilo City Emergency Operations Center (IC-EOC) para sa proper recording kag verification gamit ang S-PaSS Travel Management System
- Travel Coordination Permit
Yari naman ang lista sang pre-travel requirement para sa mga residente sang Iloilo ukon mga nagaistar kaupod ang Iloilo City Residents:
- negative RT -PCR test result, tatlo ka adlaw antes ang petsa sang pagbyahe; kag
- Certificate of Residency halin sa Barangay
Para naman sa mga indi residente sang Iloilo City:
- negative RT -PCR test result, tatlo ka adlaw antes ang petsa sang pagbyahe; kag
- kopya sang hotel ukon accommodation establishment booking
Para sa mga Authorized Persons Outside Residence (APOR):
- negative RT -PCR test result, tatlo ka adlaw antes ang petsa sang pagbyahe; kag
- Identification Card, travel order, travel itinerary kag kinahanglan mapasar ang symptom-screening sa ports of entry kag exit
Yari naman ang mga protocol para sa mga byahero nga makaesperyensya sang sintomas sang COVID-19 pag-abot mismo sa Iloilo City:
- Ang mga byahero nga makaesperyensya sang COVID-19 symptoms kaangay sang hilanat, pag-ubo, pagpalanglamig, pagsakit sang tutunlan, pagsakit sang ulo, pagkadula sang panabor kag panimaho, ang nagakadapat nga magpahibalo gilayon sa Barangay Health Emergency Response Teams (BHERTs) kag magsunod sa instruction
- Santo sa ihatag nga pagsulundan sang local health authorities, ang isa ka indibidwal ang nagakadapat magpaidalom sa RT-PCR testing sa napili nga health facility
- I-endorso naman sa ila kada barangay agud mamonitor ang mga indibidwal nga maka-angkon sang negative RT-PCR test results
- Ang mga COVID-19 positive patient naman ang nagakadapat magkompleto sang 14 -day quarantine
Samtang, gin-athag man ni Treñas nga wala sang enhanced community quarantine sa Iloilo City.
Nagpanugyan man ang alkalde sa mga pumuluyo sang syudad nga pakamaayuhon nga indi maggwa sa mga balay kun wala man sang importante nga kadtuan.
