ILOILO CITY – Nagpanindugan si Iloilo City Mayor Jerry Treñas nga dapat arestuhon ang mga drivers nga indi maghatag sang driver’s license ilabi na kun klaro ang ila nga traffic violation.
Sa interview sang Bombo Radyo kay Mayor Treñas, iya ginpahayag nga apisar padayon ang pagpahanugot sa traffic aides kag kapulisan sa pagkumpiskar sang driver’s license, prayoridad sa gihapon ang pag-manage sang trapiko.
Suno sa alkalde, nakahanda siya nga magbulig aresto sa indi maghatag sang driver’s license bilang chief implementor sang layi sa syudad.
Ginpahayag man ni Mayor Treñas nga wala siya sang pagpamatok sa legal opinion sang Department of Justice kag Department of Interior and Local Government Unit apang, daw kaangay nga wala na sang pulos ang paghimo sang Iloilo City Council sang mga ordinansa kag mahulat na lamang sang pagsulundan sang mga national government units.
Subong nga adlaw, ginalauman nga makahatag na sang legal opinion ang City Legal Office.
