Nagtambong sa kick-off rally sang Team USWAG si Iloilo City Mayor Jerry Treñas sa Iloilo Freedom Grandstand kadungan sang imbukada nga adlaw sang local campaign period sang 2025 midterm elections.
Sa nangin mensahe sang alkalde, wala sini napunggan nga tawgon nga ‘pulahan’ ang kampo ni Iloilo City Lone District Representative Julienne “Jam-Jam” Baronda nga Team Sulong Gugma.
Ini bangud man sa ila nga campaign color nga pula, samtang duag blue na man ang sa Team USWAG.
Ginpunto man ni Treñas nga apisar sang madamo nga palamangkutanon ang ginhaboy sa iya sang piyak nga kampo nahanungod sa iya nga ikaayong-lawas, mas nagpabilin siya nga malig-on kag subong, nahimo pa nga mangampanya.
Nagpalabtik man ini sa kasumpong ni incumbent Vice Mayor Jeffrey Ganzon sa pagka-bise alkalde nga nagalaragway nga indi sini luyag nga ang masunod nga vice mayor amo ang ‘obstructionist’ bangud makaapekto ini sa pag-uswag sang syudad.
Gin-ako naman sang alkalde nga magapahuway ini anay sa pulitika rason man nga ginduso sini sa pagkaalkalde ang iya anak nga si Raisa Treñas.
Apang, nagpasalig ini nga kon magbalik sa patag sang pulitika ang ginlaragway sini nga ‘protector’ kag ‘pinansyer’, indi ini magduha-duha nga magbalik man sa pulitika agud bunggo-on ang ginatungdan sini nga mga indibidwal.
Ginbuyagag man ni Treñas nga tuman kabudlay ang iya naagyan sang 2019 sa iya pagungko kasunod sang pagbansag sa syudad nga ‘most shabulized city’ sa pungsod.
