Nangin emosyonal kag naghilibion si Iloilo City Mayor Jerry Treñas sang ginsaysay sini ang iya nangin eksperyensya bilang opisyal ilabi na ang pagpunto sini sang iya mga hinimuan sa syudad.
Sa interview sang Bombo Radyo kay Mayor Treñas, iya ginapahayag nga halin sadto kag antes pa man ang pandemya, ang iya ginaubra amo ang magpadulong sa iban nga lugar agud nga mag-obserba sang maayo nga practices kag ma-apply man sa syudad sang Iloilo.
Suno kay Treñas, sa subong, naglain na gid ang sitwasyon bangud ang iban na nga syudad ang nagapadulong sa Iloilo City agud nga mag-obserba sang kauswagan.
Ginpahayag man sini nga indi sini mahimo ang tanan nga positibo nga tikang sa syudad kon wala ang sakripisyo sang mga empleyado sang Iloilo City Government.
Nagapati man ini nga ang tagsa ka ubra nga ginahatag sini sa mga department heads, ang natungdan sang maayo rason nga naimplementar man sang matalunsay.
Wala naman napunggan sang alkalde nga magtulo ang iya luha sa pagbalik-tanaw sini sa mga nangin serbisyo sini sa syudad.
