𝗜𝗟𝗢𝗜𝗟𝗢 𝗖𝗜𝗧𝗬 —Ginakabig ni Iloilo City Mayor Jerry Treñas nga indi kaaway si Punong Barangay Ronela Juaniza sang Brgy. San Isidro, Jaro, Iloilo City, apisar sang nagalapta nga pamulitika ang rason sang iya nga suspension.
Ini kasunod man sang budget sang barangay sa isa ka proyekto nga wala nag-agi sa procurement process.
Sa interview sang Bombo Radyo kay Treñas, iya ginpahayag nga ang bana ni Juaniza ang anay nangin leader sang ila team kag ini ang nangin malapit sa iya.
Ginpahayag man sini nga sang nagmasakit ang bana ni Juaniza, ginbuligan niya nga makapauli diri sa Iloilo City halin sa London.
Ginlaragway man sang alkalde nga “a good family friend” ang mga Juaniza kag indi malayo sa ila.
Ginkumparar man sini ang sitwasyon ni Juaniza kay Punong Barangay Marites Nava sang Brgy. Libertad, Lapuz, Iloilo City nga kaupod man ni Treñas sa ila team apang nasuspendi sang anom ka bulan bangud sa kaso nga ‘disgraceful and immoral conduct’.
Gin-athag man sang natungdan nga ginaubra lamang sang city council ang ila trabaho kag ginapatuman ang nagakaigo santo sa layi.
