ILOILO CITY- Positibo si Iloilo City Mayor Jerry Treñas nga madayun na gid ang Public-Private Partnership (PPP) scheme nga maga- restore sang duha sa mayor nga merkado sa syudad nga amo ang Iloilo Central Market kag Iloilo Terminal Market.
Sa interview sang Bombo Radyo kay Mayor Treñas, iya ginpahayag nga isa ka maayo nga senyales ang ginalauman nga pag-partner sang SM Prime Holdings sa syudad sa idalom sang PPP scheme matapos nga nagpabutyag ini sang intensyon nga magpartner sa rehabilitasyon sang duha ka mga merkado.
Suno sa alkalde, desidido ini nga asikasuhon gid ang nasambit nga PPP projects bangud kun madayon, ini ang mangin labing-una nga proyekto sa syudad sa idalom sang PPP scheme.
Pahayag niya, kun matabo, mas mangin mahapos na para sa syudad nga mapangitaan sang paagi ang iban pa gid nga mga proyekto nga handom niya nga mapatuman sa idalom sang PPP kaangay sang Iloilo City slaughterhouse, Integrated Solid Waste Management, kag tatlo ka reclamation projects.
Pabor ang madamo nga mga vendors sa Iloilo Terminal Market ukon Super sa rehabilitation sang merkado pinaagi sa Public-Private Partnership (PPP) scheme.
Sa interview sang Bombo Radyo kay Dante Mangalisan, presidente sang Iloilo Terminal Market Vendors Association, iya ginpahayag nga ginpaathag niya ang bentaha nga dala sang proyekto kun madayon kag ini ang nahangpan man sang mga vendors.
Suno kay Mangalisan, isa sa ginatan-aw nila nga bentaha amo nga maka-compete na ang merkado sa mga malls kun convenience kag katinlo ang istoryahan.
Nagalaum naman si Mangalisan nga tumanon ang ila ginkasugtan kasunod sang hingyo sang mga vendors nga kada tatlo ka tuig lang ang ipatuman ang rental increase sa ila mga pwesto agud indi mangin mabug-at ini para sa mga vendors.
