Iloilo City – Nanugunan si Iloilo City Mayor Jerry Treñas sa papel nga gamiton para sa imbitasyon nga ihatag kay Mr. Nereo Lujan.
Si Lujan nga pinuno sang Provincial Information and Community Affairs Office sang Iloilo Provincial Capitol ang isa sa mga mabaskog nga kritiko sang syudad sa traffic management.
Sa interview sang Bombo Radyo kay Treñas, iya ginpahayag nga sa iya nahibaluan, wala ginbaton ni Lujan ang iya imbitasyon nga maghatag sang lecture kag field demonstration sa mga traffic aides sang syudad.
Suno kay Treñas, kun wala man lang sang mahimo ipakigbahin sa pagdumala sang trapiko ang kritiko, mas maayo nalang nga indi ini pagpiliton.
Kaangot sa pahayag ni Mr. Lujan nga wala ini sang may nabaton nga terms of reference gikan sa alkalde kaangot sa pag-lecture niya, suno kay Treñas, indi insakto nga siya pa ang kinahanglan nga mangaluyag kay Lujan.
Pahayag dugang sang alkalde, tinutuyo lamang sini nga imbitaron ang natungdan agud maghatag sang solusyon sa pag-improve ang sitwasyon sang trapiko sa syudad.
