POTOTAN,ILOILO – Madamu sang may nakita nga rason si Pototan, Iloilo Mayor Adi Lazaro kun nga-a nagapanguna ang banwa sa listahan sang may pinakamadamu nga kaso sang Dengue sa probinsya sang Iloilo.
Sa interview sang Bombo Radyo kay Mayor Lazaro, iya ginpahayag nga bangud patag ang banwa sang Pototan, nagasupot ang tubig sa tion nga mag-ulan kag ang stagnant water ang ginapugadan sang lamok.
Magluwas diri, amat-amat naman nga nagakalbo ang mga kagulangan kag gindugangan pa sang climate change ukon ang pag-lain sang tiyempo.
Sa 50 ka mga barangay sa nasambit nga banwa, ginpahayag sang alkalde nga halos katunga ang apektado sang Dengue Hemorrhagic Fever.
Bangud sini, magluwas sa ‘Do Day Kontra Dengue Drive’, nagbakal naman sang mga bulong para sa mga pasyente kag bulong nga pamatay sang lamok ang Local Government Unit (LGU) agud nga matapna ang pagduging sang nasambit nga balati-an.
