ILOILO CITY – Nangin emosyunal si Iloilo City Mayor Jed Patrick Mabilog sa ginapangatubang nga panghangkat matapos nga gin-assign ni Presidente Rodrigo Duterte si Chief Insp. Jovie Espenido.
Kadungan sang flag ceremony sa Iloilo City Hall kaina sang aga, nagtulo ang luha sang alkalde sa pag-atubang sang mga empleyado sang city hall.
Indi maintyindihan ni Mabilog kun ano ang natabo bangud sang nakaligad lang nga semana ginpahayag ni Presidente Duterte nga indi na “hot bed” sang iligal nga droga ang Iloilo apang karon gin-assign si Espenido sa Iloilo.
Suno sa alkalde, tanan nga ginpangayo sang PNP kag PDEA sa kampanya batok sa iligal nga droga, iya ginhatag pero kun kulang pa ini sa panan-awan sang iban, nagapangayo siya sang pasaylo sa mga pumuluyo sang siyudad.
Nagapati ang alkalde nga panghangkat sa iya sang Diyos ang pag-assign kay Espenido sa Iloilo kag liwat ginpanindugan nga wala ini sang ginaprotektahan nga drug lord.
Ginatugyan na lang ni Mabilog sa Diyos ang iya kabuhi bangud bisan diin siya magkadto kun gustuhon sang Diyos nga mapatay siya, mapatay gid siya.
Sa ginpahayag naman ni Espenido nga mahimo siya mag-surrender, ginpahayag ni Mayor Mabilog nga dapat anay siya imbestigaran kag kun may nagakaigo nga ebidensiya, pasakaan siya sang kaso bangud wala man sang problema sa iya ang pag-surrender.