ILOILO CITY – Ginatugyan na lang ni Iloilo City Mayor Jed Patrick Mabilog kay Chief Insp. Jovie Espenido ang paghusgar sa ginahimo nga tikang sang siyudad sang Iloilo para matapna ang iligal nga droga.
Reaksyon gihapon ini sang alkalde kasunod sang mandu ni Presidente Rodrigo Duterte nga ipadala si Espenido sa Iloilo.
Suno kay Mabilog, ginhimo na sini ang tanan nga masarangan para matapna ang illegal drugs sa siyudad apang kun kulang pa ini sa panan-awan sang presidente, nagapangayo siya sang pasaylo.
Madugay na suno sa alkalde nga ginatinguhaan niya nga maatubang si Presidente Duterte agud maprisintar ang mga ginahimo nga tikang sang siyudad, apang wala siya ginhatagan sang tiyansa.
Pag-abot ni Espenido sa siyudad, ginpahayag ni Mabilog nga iya iprisintar ang mga nahimo na sang Iloilo City sa kampanya batok sa iligal nga droga.
Nagapati ang alkalde nga may iban nga tawo nga nagapalab-ot sang sala nga impormasyon sa Presidente apang nagalaum nga pag-abot ni Espenido sa siyudad, makita sini ang kamatuoran.
Kun may kulang pa suno kay Mayor Mabilog, kuntani magbulig si Espenido sa siyudad kun ano pa ang dapat nga buhaton.
Ginakasubo sang alkalde nga kabahin siya sang mga ginakabig ni Presidente Duterte nga drug protector apang nagapanindugan nga wala ini sang kahilabtanan sa iligal nga droga.
Nagpangayo man sang pasaylo si Mabilog nga naglain ang imahe sang siyudad kag ginatugyan na lang sa Diyos ang tanan, sa tunga sang mga kahangawa nga delikado ang iya kabuhi kun sa Iloilo na si C/Insp. Espenido.