ILOILO CITY – Indi mahatagan sang closed-in police security sang Police Regional Office (PRO-6) si Mayor Jed Patrick Mabilog sa iya pagbalik sa serbisyo.
Suno kay PRO-6 director C/Supt. Cesar Hawthorne Binag, wala pa sila sang mandu gikan sa Malacañang matapos nga ginmandu sadto ni Presidente Rodrigo Duterte nga i-recall ang pulis nga nagabantay sang mga ginpanghingadlan sini nga narco-politician.
Pahayag pa ni Binag, ila himuon ang tanan agud masiguro ang seguridad sang alkalde sa pagbalik sini kag maga-deploy man sang pulis sa mga lugar nga kadtu-an sini.
Apang suno kay Binag, indi mahimo mag-closed-in security ang pulis kay Mabilog matapos nga isa ini sa ginhingadlan sang Presidente bilang drug protector.