ILOILO CITY – Wala na sang plano ang kampo ni Iloilo City Mayor Jed Patrick Mabilog nga patulan ang bag-o nga mga akusasyon ni Presidente Rodrigo Duterte.
Ini matapos hambalon sang Presidente kagab-i nga gina-into siya ni Mabilog, sang magtanyag ini sang P1 million para sa mga makatudlo sa drug personalities.
Ang ginatumod sang Presidente amu ang P1.1 million nga reward money sa makatudlo sa drug lord sa Western Visayas nga si Richard Prevendido nga namatay sang otoridad.
Sa interview sang Bombo Radyo Iloilo, ginpahayag ni Atty. Mark Piad, legal counsel kag spokesman ni Mabilog, no comment na sila pero ginarespeto ang pahayag ni Duterte.
Ano man ang hambalon sang Presidente, nagapabilin suno kay Piad ang ila panindugan nga atubangon ang mga isyu nga ginabato sa alkalde.
Posible suno kay Atty. Piad nga nagsala lang si Duterte sa paghambal nga P1 million ang ginatanyag nga reward ni Mabilog.
Nahibaluan nga sa reward money kay Prevendido, P500,000 ang gikan sa Iloilo City government; P500,000 gikan sa Iloilo Provincial Government samtang ang P100,000 ang gikan sa Police Regional Office 6.
Apang ginpahayag ni Piad nga iya usisaon si Mayor Mabilog kun nakahatag gid man ini sang P1 million nga reward money.
