ILOILO CITY – Maga-file sang motion for reconsideration ang kampo ni Iloilo City Mayor Jed Patrick Mabilog sa Ombudsman may kaangtanan sa ginapangatubang nga kaso bangud sa ginsudlan nga kontrata sa isa ka towing service para sa wheel clamping ordinance sang siyudad.
Sa interview sang Bombo Radyo, ginpahayag ni Atty. Mark Piad, legal counsel kag spokesman sang alkalde, ginpalab-ot na nila kay Mayor Mabilog ang desisyon sang Ombudsman nga may probable cause ang kaso kag ginapasaka na sa Sandiganbayan.
Suno kay Piad, ginamanduan na sila sang alkalde nga himuon ang tanan nga legal means, apang sa pihak sini, nagapakabakod si Mabilog.
Nahibaluan nga yara karon sa iban nga pungsod si Mayor Mabilog kag naka-sick leave kun sa diin ginapahuway sini ang kaisipan kag emotional condition suno kay Piad.
Apisar kaadlawan subong sang alkalde, ginpahayag ni Atty. Piad nga indi lubos mahambal nga malipayon ini nga kaadlawan para kay Mabilog bangud sa ginapahayag mga pamahog sa kabuhi sini.
Nagpatigayon sang prayer vigil ang mga supporters ni Mayor Mabilog kadungan sang kaadlawan sang alkalde.