ILOILO CITY – Ginpasiguro sang Police Regional Office 6 (PRO-6) ang seguridad ni Iloilo City Mayor Jed Patrick Mabilog sa pagbalik sini sa siyudad sang Iloilo.
Nahibaluan nga natapos na ang sick leave sang alkalde.
Ginpahayag ni PRO6 director C/Supt. Cesar Hawthorne Binag sa interview sang Bombo Radyo nga mismo si Mayor Mabilog ang nagpakig-angot kay PNP chief Director General Ronald dela Rosa angot sa iya seguridad.
Suno kay Binag, ila man ginahimo ang tanan para maprotektahan ang kabuhi sang alkalde.
Nagbiya sa pungsod si Mayor Mabilog sa kainitan sang isyu sa pag-assign ni President Rodrigo Duterte kay C/Insp. Jovie Espenido sa Iloilo City nga sang ulihi ginbawi man sang PNP.
Nagtambong ang alkalde sa international forum sa Japan antes nagdiretso sa Malaysia para sa isa ka summit kag nag-sick leave bangud sa stress kag diabetes.