ILOILO CITY – Wala malingkang ang kampo ni Iloilo City Mayor Jed Patrick Mabilog sa pag-wiretap ni Presidente Rodrigo Duterte sa alkalde.
Ginpahayag sa Bombo Radyo ni Atty. Mark Piad, abogado kag spokesperson ni Mayor Mabilog, wala sila nahadlok bangud wala man sang may ginahimo nga malain ang alkalde.
Mahulat lang sila sang mga development suno kay Piad, sa nangin lihok sang Presidente.
Sa ti-on nga magpasaka sang kaso ang Duterte administration batok kay Mayor Mabilog base sa resulta sang pagpaniktik sa alkalde, amu kag maghimo sila sang legal nga tikang suno sa abogado.
Nakahanda sila suno kay Atty. Piad nga atubangon ang anuman nga kaso nga mahimo ipasaka sang Duterte administration batok kay Mayor Mabilog.