ILOILO CITY – Ginpanindugan sang kampo ni Iloilo City Mayor Jed Patrick Mabilog nga wala nagapanago ang alkalde sa luwas sang pungsod kungdi naga-recuperate sa iya diabetes kag sa stress.
Ini matapos ginpahayag ni Presidente Rodrigo Duterte nga nagpalagyo na si Mabilog bangud nahadlok kay Chief Insp. Jovie Espenido nga sadto ginmanduan sang Presidente nga ma-assign sa siyudad sang Iloilo.
Sa interview sang Bombo Radyo, ginpahayag sang abogado kag spokeperson ni Mabilog nga si Atty. Mark Piad nga ginakasubo nila kun ini ang pagpati sang Presidente.
Apang magaabot ang ti-on suno kay Piad nga mabalik si Mayor Mabilog gikan sa sick leave sini kag magpaathag.
Sa karon indi gihapon mahambal ni Atty. Piad kun diin nga pungsod ang alkalde bangud limitado ang ila komunikasyon.
Wala sa plano sang alkalde ang magpanago suno kay Piad, bangud may mandato ini nga dapat tungdan para sa mga pumuluyo sang siyudad.