ILOILO – Nagsabat pinaagi sa Bombo Radyo si Janiuay, Iloilo Mayor Bienvenido Margarico may kaangtanan sa kontrobersiyal nga online bulang sa iya banwa.
Sa exclusive interview sang Bombo Radyo kay Margarico, iya ginpahayag nga gilayon nga nagpaathag ang operator sang online bulang sa iya talatapan matapos nabalahuba ang iligal nga aktibidad.
Suno sa alkalde, ang nasambit nga sabat ang iya ilakip sa ipasa nga reply sa ipapanaog nga letter of recommendation ni Department of the Interior and Local Government (DILG) Iloilo Provincial Director Teodora Sumagaysay.
Indi naman mapaathag sang alkalde ang kaundan sang reply bangud may mga terminolohiya sa bulang nga indi niya maintindihan.
Gin-athag man sang opisyal nga ginahimo sang local Inter-Agency Task Force sa banwa sang Janiuay, Iloilo ang ila katungdanan.
Apang naghimo gid sang paagi ang mga operators agud makapatigayon sang online bulang.
