Nakagwa na sa prisohan si Former Calinog Mayor Salvador “Badong” Divinagracia nga naka-hit and run-patay sa 19-anyos nga lalaki sa banwa sang New Lucena sang gab-i sang Marso 15.
Ini matapos nga nagdesisyon ang pamilya nga indi na magpasaka sang kaso batuk sa anay nga alkalde.
Sa interview sang Bombo Radyo kay PLt. John Rey Laru-an, hepe sang New Lucena Municipal Police Station, iya ginpahayag nga nagpirma kahapon sang hapon sang Affidavit of Desistance ang pamilya sang biktima rason nga nakagwa sa prisohan si Former Mayor Divinagracia.
Suno kay PLt. Laru-an, ginpahayag sang pamilya nga bisan masakit sa ila ang natabo sa ila himata, indi na mabalik sini ang iya kabuhi bisan pa nga magpasaka sila sang kaso rason nga nagpirma na lang ang mga ini sang Affidavit of Desistance.
Pahayag pa ni PLt. Laru-an, may yara naman sang agreement kag settlement sa tunga sang pamilya sang biktima kag sang anay alkalde kun sa diin nabatun na sang pamilya ang financial assistance halin sa anay alkalde.
Dugang pa sini, sa karon ginakabig na nga ‘cased close’ ang kaso bangud sa rason nga indi na magpasaka sang kaso ang pamilya sang biktima.
