Naigo sang Russian drone ang Northern Bridge sa Kyiv, Ukraine kadungan sang pagbisita ni German Chancellor Friedrich Merz bilang pagpakita sang suporta kay Ukrainian President Volodymyr Zelensky.
Suno kay Kyiv Mayor Vitaliy Klitschko, duha ka persona ang nasamaran sa pag-atake.
Sa mga video, makita ang dako kag madamol nga aso halin sa taytay.
Ini na ang ikaduha nga tion nga gin-igo ang Northern Bridge sa sulod lamang sang duha ka adlaw, samtang padayon nga ginapabaskog sang Russia ang mga pag-atake sini batok sa kapital sang Ukraine.
Nahibaluan nga una na nga ginkumpirma sang Presidente sang Ukraine nga si President Volodymyr Zelenskyy nga ila pa nga pabaskuron ang pag-atake sa mga oil refinery kag energy facilities sang Russia.
Ini bilang sabat sa bag-o nga patakaran sang Moscow nga pasangkaron pa ang pag-atake sa mga target sa Ukraine.
Suno kay Zelenskyy, possible nga lakip sa target sang Russia ang mga imprastruktura, logistics, karsada, eskwelahan kag ospital sa ila nga pungsod.
Gane, suno kay Zelenskyy nga magabalos sila sa mga target energy apang indi nila target ang mga sibilyan.
Padayon ang pag-atake sang Russia gamit ang drones kag missiles, lakip na diri ang mga pag-atake sa energy at telecommunications infrastructure sang Kyiv.
Ginpabaskog pa sang Ukraine ang air defense sini gamit ang F-16s, electronic jamming kag interceptor drones batok sa mga bago nga Russian drones.
Padayon man ang ginapatigayon nga peace talk sang US kag Europe, samtang nagapangayo ang Ukraine sang dugang nga financial kag military assistance.
