Wala gin-confirm, apang wala man gin-deny ni Iloilo City Vice Mayor Lady Julie Grace “Love” Baronda kon may yara sang kahilabtanan si Mayor Raisa Treñas sa nagakalatabo subong sa Sangguniang Panlungsod, lakip na ang issue nahanungod sa iya legislative powers.
Sa interview sang Bombo Radyo kay Vice Mayor Baronda, iya ginpahayag nga indi niya direkta masiling kon may yara sang involvement ang alkalde, apang ginpahayag niya nga kaangay may yara sang pattern ang mga nagakalatabo.
Suno kay Baronda, posible nga isa ini ka political move sang pihak nga grupo.
Pahayag niya, kon ini ang isa ka politakal move, nagapakita lamang nga indi confident enough ang iban nga opisyales nga tugutan ang iban nga lider nga makapasar sang mga ordinansa ukon resolusyon nga makabulig sa siyudad.
Ini bangud, suno sa iya, dapat confident ang isa ka lider sa iya kaugalingon kag handa nga maghatag sang kahigayunan sa iban nga lider nga makahimo kag makapasar sang mga programa ukon ordinansa nga makabulig sa ikaayo sang syudad.
Dugang pa niya, indi na ini dapat magbase sa personalidad ukon sin-o ang makakuha sang credit, kundi dapat magpukos sa accountability, transparency kag ila ginsumpaan nga good governance para sa pumuluyo sa syudad sang Iloilo.
