Gindeklarar ni Mayor Raisa Treñas sang Iloilo City ang Temporary Cease and Desist Order batok sa tanan nga ongoing waterway projects sang Iloilo City District Engineering Office sang Department of Public Works and Highways kag sang Iloilo City District Engineering Office sa distrito sang Jaro.
Sa interview sang Bombo Radyo kay Joy Fantilaga-Gorzal, tagpamaba ni Mayor Treñas, iya ginpahayag nga ang proyekto sang DPWH-ICDEO gin-implementar nga wala sang prior coordination sa lokal nga gobyerno, kabangdanan sang paglapas sa DPWH Department Order No. 110.
Ginpunto man ni Gorzal nga ang mga proyekto pareho sang slope protection, bike lane kag access road nangin kabangdanan sang pagbaha, paguba sang propedad, kag may kaso sang kamatayon, lakip na ang 13-anyos nga bata nga nalunod sa Buntatala Creek.
Dugang pa, ginpahayag man ni Mayor Treñas nga nagkadto sa iya opisina si Mayor Sofronio Fusin sang Oton agud magpangayo sang bulig, matapos nakaeksperyensya sang pagbaha ang anum ka barangay sa ila banwa, nga wala pa natabu bisan sang bagyo Frank sang 2008.
Ginkilala naman sang DPWH Regional Office VI ang ini nga isyu, kag nagpasalig sila nga ila ini inspeksyonon.
Magapadayon ang Cease and Desist Order tubtob nga may siyentipiko kag independyente nga pagtuon nga magapakita nga luwas kag epektibo ang nasambit nga proyekto.
