ILOILO CITY – Ginapasalamatan ni Buenavista, Guimaras Mayor Eugene Reyes ang pag-athag sang Department of Health tuhoy sa protocol nga ginbasehan sa pag tally sang Coronavirus Disease 2019 (COVID-19) cases.
Ini ang may kaangtanan sa pagkwestyon sang alkalde kun nga-a sa Buenavista, Guimaras ginhatag ang tally sang isa ka Overseas Filipino Worker nga nagpositibo sa COVID-19 apisar nga wala pa ini nakapauli sa nasambit nga lugar.
Sa interview sang Bombo Radyo kay Reyes, iya ginpahayag nga ang tally ang ihatag sa lugar kun sa diin nakumpirma ang pagpositibo sang pasyente.
Ginhalimbawa ni Reyes ang mga Overseas Filipino Workers nga nagpositibo sa COVID-19 kun sa diin ang positive cases ang ginadugang sa record kun sa diin nga lugar sila nagatrabaho.
Gin-athag man sang alkalde nga wala niya ginasikway ang nasambit nga OFW apang luyag lang niya maathagan tuhoy sa protocol nga ginasunod sang Department of Health may kaangtanan sa pag tally sang COVID-19 cases.
May kaangtanan naman sa Social Amelioration program, ginpahayag ni Reyes nga sang Abril 24 pa naubos sa pagpanghatag ang cash assistance.
Bangud sini, nagapasalamat ang alkalde sa tanan nga nagbulig agud nga matapos gilayon ang cash distribution antes pa man ang una nga deadline nga gintalana sang Abril 30.
