GUIMARAS – Wala sang may nabaton nga official communication halin sa Inter-Agency Task Force si Buenavista, Guimaras Mayor Eugene Reyes tuhoy sa pag-abot sang repatriated Overseas Filipino Workers kahapon, Mayo 25.
Ini ang kasunod sang pagreklamo sang mga Overseas Filipino Workers nga kasubong nga ginpasa-pasahan lamang sila bangud sa kakulang sang proper coordination.
Sa interview sang Bombo Radyo kay Reyes, iya ginpahayag nga wala gid siya sang may nabaton nga impormasyon tuhoy sa repatriation sang madamo nga Overseas Filipino Workers kun sa diin ginabanta 6-7 ang taga Buenavista, Guimaras.
Suno kay Reyes, nahibalu-an lang niya ang tuhoy sa nasambit nga problema sang may nagpahibalo sa iya hinablos nga himata sang nagpauli nga Overseas Filipino Workers.
Ginpahayag ni Reyes nga may yara na sang ginhatag nga pagkaon para sa mga Overseas Filipino Workers nga nagatinir sa subong sa isa ka lodge sa syudad sang Iloilo.
Sang gindul-ong ang pagkaon kaina sang aga, ginpahayag sang alkalde nga wala sang bisan isa nga tiglawas gikan sa Overseas Workers Welfare Administration nga amo ang may katungdanan sa akomodasyon.
Kadungan sini, nagpabutyag naman sang pagkadismaya si Reyes batok kay Gov. Samuel Gumarin matapos ang pagpadala sang sulat sang gobernador nga kinahanglan nga ang mga alkalde gid sang tagsa ka banwa ang magatambong sa pagsinapol sa baylo nga representative lamang.
Suno sa alkalde, indi sa tanan nga tion, makatambong ang mga alkalde bangud sa kasakuon kun kaisa kag ginapili na lang nila nga magpadala sang representative.
Ginpahayag sang natungdan nga sa tanan nga banwa sa bug-os nga probinsya, ang Buenavista gid lamang ang pinasahi bangud nga ang Provincial Government mismo ang nagapanguna sa pagpanghatag sang bulig sa baylo nga ang Local Government Unit.
