ILOILO CITY–Ginreklamo ni Mayor Ronaldo Onal Golez sang Dumangas, Iloilo bangud kaangay nga ginapabay-an ang local government unit nga solo nga abagahon ang mga nagakastranded nga pasahero sa Dumangas port sa kada tion nga malain ang tiempo.
Sa interview sang Bombo Radyo kay Mayor Golez, ginpahayag niya nga bilog nga Panay ang ginaakomodar sang pantalan gani linibo man ka mga tawo ang nagakastranded.
Bangud sini, nagapangayo siya sang bulig sa provincial government sang Iloilo pinaagi sa pagtukod sang memorandum of agreement agud nga mahatagan man sang prayoridad ang ila banwa bilang entry kag exit point sang mga pasahero padulong kag naggikan sa nagkalain-lain nga lugar sa rehiyon.
Nagahingyo man ang alkalde nga buligan sang Regional Development Council ang ila banwa.
Ginsabat ni Provincial Administrator Dr. Raul Bañas ang reklamo ni Dumangas Mayor Ronaldo Golez.
Sa interview sang Bombo Radyo kay Bañas ginpahayag niya nga wala man nagapahibalo si Golez tuhoy sa iya ginapangayo nga bulig.
Suno sa provincial administrator, kun may yara sang request, indi man magpamalibad ang provincial government nga magbulig.
Sa pagkamatuod suno kay Bañas, tuyo sang provincial government nga panamion pa gid ang Port of Dumangas.
Suno kay Bañas, ginahikot na ni Governor Arthur Defensor Sr. ang pag-invest sang isa ka negosyante sa Dumangas Port.
Ang ini nga lihok ang naangot sa plano nga himuon ang pantalan bilang international container port.
Nahibaluan nga nakigkita si Governor Defensor kay Enrique Razon sang International Container Terminal Services .(ICTSI) para sa nasambit nga plano duha ka semana na ang nagligad.