TUBUNGAN, ILOILO – Ginabanta 9 tubtub 11 ka barangay sa Tubungan, Iloilo ang may yara sang pamahog sang rebelde nga grupo.
Ini ang personal assessment ni Mayor Roquito Tacsagon kasunod sang asud-asud nga engkwentro nga natabo sang damlag lang.
Sa interview sang Bombo Radyo kay Tacsagon, iya ginpahayag nga indi mahinago nga isa sa problema sa Tubungan amo ang presensya sang rebelde nga grupo.
May kaangtanan sa asud-asud nga engkwentro, wala napunggan ni Tacsagon nga magpabutyag sang pagkadismaya.
Emosyonal si Tacsagon samtang ginahingyo sa bahin sang rebelde nga grupo nga sundon ang ceasefire ukon indi gani, magbiya na lang sa Tubungan bangud madamu nga sibilyan ang naapektuhan.
Ginakabig naman sang alkalde nga daku nga pagpanghangkat ang pagsolbar sang problema sa insurhensya.
Sa Biyernes, natalana nga igadeklarar sang Local Government Unit sang Tubungan nga persona non grata ang rebelde nga grupo.
