Naakig kag naglain ang buot ni San Jose del Monte, Bulacan Mayor Rida Robes matapos ginsugata siya sang mga singgit nga “tubig, tubig” sang nag-abot siya agud magtambong kuntani sa isa ka basketball game.
Sang yara na siya sa Minuyan Sports Complex, wala napunggan sang mga tawo nga ipabati sa iya ang ila sentimyento sa krisis sa tubig sa ila nga lugar.
Antes nagbiya sa venue, nakahatag pa sang speech ang alkalde kag nagpahanumdom sa kabataan kag sa lokal nga mga opisyal nga respetuhon siya bilang alkalde.
Ginpanglawag man sini ang kontribusyon sang local government sa Barangay Minuyan Proper.
“Hindi tama, Minuyan Proper, lahat ng pagbibigay, ibinibigay ko sa inyo. Kung sino man ang nag-uudyok sa inyo na walanghiyain ang isang punong-lungsod at kongresista, aba, mahiya naman kayo,” suno sa alkalde.
Nagpaguwa man gilayon sang statement ang San Jose del Monte, Bulacan City Youth Sports and Development Office kag Sangguniang Kabataan Federation kag ginsaway ang ginapahayag nga “disrespectful” nga pamatasan matapos ang insidente.
Sa ila joint statement, ginakilala sang duha ka opisina ang valid nga mga reklamo sang mga residente kaangot sa masami nga pagkautod sang suplay sang tubig, apang ginpahayag nila nga may husto nga oras, lugar kag paagi sa pagpahayag sang mga reklamo, agud indi ini makadisturbo sa mga programa para sa kabataan.
Sa post naman sang netizens sa Bulacan, ginpangbuyagyag nga madugay na nga problema sa madamo nga mga barangay sa San Jose del Monte ang utod-utod nga suplay sa tubig.
