Mayor Christian Sorongon of New Lucena, Iloilo
NEW LUCENA, ILOILO – Hugot nga ginabaton ni Mayor Christian Sorongon ang kalutusan batok kay Iloilo 2nd District Board Member Liecel Mondejar-Seville sa pagka-alkalde sa New Lucena, Iloilo.
Sa interview sang Bombo Radyo kay Mayor Sorongon, iya ginpahayag nga iya gid nga ginatahod ang desisyon sang pumuluyo nga mas paboran si Seville nga mangin alkalde.
Sa pihak sang kalutusan sa pulitika, ginpahayag man ni Sorongon nga nalipay siya bangud nga may yara na siya sang tion para sa personal nga pagpangabuhi.
Bugal para sa iya suno kay Sorongon nga mapili-an bilang alkalde sa edad nga 25 anyos kag nabuslan ang 30 anyos nga dinastiya sang pamilya Mondejar sa ila banwa.
Kadungan sini, isa-isa man nga ginsabat ni Sorongon ang mga isyu nga ginahaboy sa iya sang kasumpong sa pulitika kasubong na lang sa indi pag-angkon sang Seal of Good Local Governance sang siya pa ang alkalde.
Sa pagpaathag sang alkalde, naka-angkon sang Seal of Good Local Governance ang New Lucena sang siya na ang nagapamuno apang
ang nasambit nga pasidungog ang gina-angkon ni Seville.
Tuhoy naman sa posibilidad sang reconcilation nga matabo sa tunga nila ni Seville, ginpahayag ni Sorongon nga wala na sang rason nga mag-inaway ang ila pamilya bangud sa iya bahin suno sa natungdan, wala na siya sang interes sa pulitika.
Yari ang reaksyon ni Mayor Sorongon tuhoy sa iya pagkalutos sa pulitika:
Samtang, yari naman ang sabat ni Sorongon tuhoy sa ginapahayag indi pag-angkon sang Seal of Good Local Governance:
Pamati-an naman ang pahayag sang alkalde tuhoy sa posible reconcilation nila ni Seville:
