ILOILO CITY – Dismayado si Iloilo City Mayor Jerry Treñas may kaangtanan sa impormasyon nga nakalab-ot sa iya nga may empleyado sang Iloilo City Govenrment nga nagapanukot sa mga Locally Stranded Individuals agud nga makapauli sa syudad sang Iloilo.
Sa interview sang Bombo Radyo kay Treñas, iya ginpahayag nga indi na trabaho sang empleyado sang Iloilo City Government ang magpanukot sa Locally Stranded Individuals kag wala ini ginapahanugutan sa government service.
Suno kay Treñas, wala siya sang may nabaton ang paathag tuhoy sa nasambit nga impormasyon apang nakahanda siya nga magpamati agud nga mahibalu-an ang matuod.
Ginpahayag ni Treñas nga wala ginasukot ang mga Locally Stranded Individuals kun gobyerno ang nagpatigayon sang repatriation.
Nauna na nga ginpahayag ni City Tourism Office Head Junel Ann Divinagracia nga wala siya sang may ginbaton nga bayad may kaangtanan sa pagpatigayon sang chartered flight kun sa diin sakay ang negosyante nga si Jonathan Granada kaupod ang 32 ka iban pa nga Ilonggo.
Nahibaluan nga ang nasambit nga chartered flight nga halin sa Metro Manila ang ginapahayag inisyatibo mismo sang Locally Stranded Individuals agud nga makapauli gilayon sa Iloilo.
