Wala napunggan sang alkalde sang syudad sang Iloilo nga ipabutyag ang kadismaya sa national government angot sa tagtaganay sang COVID-19 vaccines.
Sa interview sang Bombo Radyo kay Iloilo City Mayor Jerry Treñas, iya ginpahayag nga dako nga palamangkutanon kun ngaa gamay sa gihapon ang ginahatag nga mga bakuna sa syudad apisar gintumod na sang Department of Health nga high risk sa COVID-19 ang Iloilo City.
Suno kay Treñas, wala sang kinalain ang numero sang mga bakuna nga ginahatag sa syudad ipaanggid sa iban nga local government unit.
‘Unfair’ man suno sa alkalde ang gobyerno bangud sang nagtimbuok ang kaso sang COVID-19 sa National Capital Region, halos didto na nagkadto ang tanan nga bakuna nga gindonar sa pungsod.
Apang sang natabo man ang pagsurge sang kaso sang virus sa syudad, wala man sa gihapon nakabaton sang nagakaigo nga suporta ang Iloilo City
Dugang pa ni Mayor Treñas, tubtob lamang sa pasalig ang national government apang wala man ginatuman.
