𝗜𝗟𝗢𝗜𝗟𝗢 𝗖𝗜𝗧𝗬 — Ginpaathag ni Iloilo City Mayor Jerry Treñas nga ara na sa maayo nga kahimtangan ang ila nga relasyon sa Civil Aviation Authority of the Philippines (CAAP).
Ini kasunod man sang rekomendasyon sang alkalde nga pahalinon ang mga officers sang amo nga ahensya bangud sa indi makita ang P190 million nga budget para sa modernisasyon sang Iloilo International Airport.
Sa interview sang Bombo Radyo kay Mayor Treñas, iya gin-ako nga nabudlayan ang nasambit nga ahensya nga pangitaon ang budget nga gin-propose ni Senator Grace Poe para sa privatization sang Iloilo International Airport.
Suno kay Treñas, madamo sang whereas kag mga hulubaton ang Civil Aviation Authority of the Philippines apang sa ulihi nagpasalig man nga matapos ang proseso sang privatization sang airport sa una nga quarter sang 2025.
Ginpahayag man sini nga lakip sa privatization amo ang pag-rehabilitate sang Passenger Terminal Building nga nagabalor sang P45 million; rehabilitation sang Flight Information Display System nga nagabalor P30 million; pagbakal sang duha ka unit chillers with 600-watt Cooling Capacity nga may estimated cost nga P29.5 million; kag rehabilitation sang Private Automatic Branch Exchange System nga nagabalor P20.5 million.
Nagpasalig naman ang Civil Aviation Authority of the Philippines nga kinahanglan pa nila nga makig-istorya sa Department of Transportation agud nga matigayon na nga maproseso ang budget.
Nahibaluan nga may yara na sang tatlo ka mga kompanya ang nagpakita sang interes sa Iloilo International Airport.
Ini amo ang Villar Group of Companies, Aboitiz & Company, Inc., kag Megaworld Corporation.
Nagapati naman ang alkalde nga kon sin-o man ang makakuha sang bid, nagapati ini nga yara sa maayo ang mangin kahimtangan sang Iloilo International Airport.
