ILOILO CITY- Hugot nga ginpanginwala ni Iloilo City Mayor Jerry Treñas ang impormasyon nga nakigsapol ini kaupod ang iya anak nga si Miguel Treñas kay Liza Araneta Marcos, asawa ni presidential aspirant former Senator Ferdinand BongBong Marcos.
Sa interview sang Bombo Radyo kay Mayor Treñas, iya ginpahayag nga lunsay pagpatalang lamang ini kag ginaubra sang iya mga kasumpong agud gub-on sila sang iya anak nga nagapadalagan sa pagka-konsehal.
Gin-ako niya nga nakapakig-angot sa iya si Liza Marcos sang nagpadulong ini sa Iloilo apang wala sila nagkitaay.
Suno sa alkalde, wala ini sang plano nga magtipyok ukon mag-upod sa sin-o man nga presidential candidate magluwas lang kay Vice President Leni Robredo.
Nagpangabay man ini sa iya mga kasumpong nga nagapakalain sa iya nga magtuon nalang agud may mabulig sila sa syudad sa baylo nga mangguba sang tawo.
