Ginalauman sang Iloilo City Government nga matapos sa sulod sang sini nga tuig ang mga commitment sang scientist nga gin-commission sa paghimo sang hydrologic study agud marepaso na ang iya final output kag mapadayon ang preparasyon sang Comprehensive Drainage Master Plan.
Suno kay Mayor Raisa Treñas, kinahanglan anay marepaso ang proposal kag resulta sang pagtuon antes umpisahan ang paghimo sang master plan, nga may gin-earmark nga ginabanta P7 milyon nga pondo.
Ginpahayag ni Treñas nga nagasugod na ang koordinasyon sang Iloilo City Government sa mga kaangtanan nga ahensya kag eksperto agud malikawan ang duplication sang mga proyekto kag masiguro ang husto nga paggamit sang government resources.
Nahibaluan nga natapos na ang hydrologic study nga kung sa diin gintun-an ang topography sang Iloilo City, flow sang tubig kag mga kabangdanan sang pagbaha, nga mangin basehan sang long-term flood mitigation measures.
Text by: Bombo Cyrene A. Nasis
