𝗜𝗟𝗢𝗜𝗟𝗢 𝗖𝗜𝗧𝗬 —Ginakabig ni Iloilo City Mayor Jerry Treñas nga irreparable damage man ang mga wala natapos nga proyekto sang Iloilo City District Engineering Office (ICDEO).
Ini kasunod man sang ginpaguwa nga statement ni Engineer Roy Pacanan nga nagapahayag nga dako nga damage para sa iya ang pagdeklera sa iya sang alkalde bilang persona non grata sa syudad.
Sa interview sang Bombo Radyo kay Mayor Treñas, iya ginpahayag nga sugod sang nagpangayo siya tubtob subong, wala sa gihapon naka-submit sang master plan ang Department of Public Works and Highways (DPWH).
Suno kay Treñas, posible naman nga mabag-o ang sirkumstansya kon gilayon nga nagpasa ang ahensya sang ginapangayo sang city government.
Ginpahayag man sini nga ang tanan nga proyekto sang ahensya lakip ang binilyon nga balor sang drainage nga wala matapos ang ginakabig man niya nga ‘irreparable damage’.
Ginpanginwala naman sang alkalde nga ang city government ang may sala kon magbaha-baha sa syudad bangud ang Department of Public Works and Highways ang may kapot sang ila nga mga drainage nga proyekto.
