ILOILO CITY – Ginakalipay ni Mayor Jerry Treñas ang pagkalakip sang syudad sang Iloilo sa Low Risk Areas kun Coronavirus Disease 2019 (COVID-19) ang pagahambalan.
Sa interview sang Bombo Radyo kay Treñas, iya ginpahayag nga apisar sang maayo nga balita, magapabilin sa gihapon ang pila ka restrictions.
Suno kay Treñas, iya nga pagasapulon ang business kag transportation sector lakip na ang COVID-19 team agud nga maplastar sang maayo ang igapatuman nga exit plan.
May kaangtanan naman sa pagpadayon sang byahe sang barko kag eroplano, ginpahayag sang natungdan nga nakadepende na ini sa national government.
Ginpahayag ni Treñas nga umpisa sa Mayo 16, dulaon na ang Liquor Ban apang may yara lang sang limitasyon agud nga indi na masulit ang natabo sang nakaligad nga nagdamo ang insidente sang pagmaoy kasunod sang lifting order.
Samtang, wala naman sang problema sa alkalde ang pag-abot sa Panay sang 66 nga Overseas Filipino Workers buwas, Mayo 13.
Sa pagkamatuod suno sa natungdan, may yara sang koordinasyon sa tunga sang mga ahensya sang gobyerno.
Gin-athag sang alkalde nga wala niya ginapunggan ang repatriation sa baylo, luyag lamang niya nga may yara sang pagpanghanda agud nga wala na sang dapat pa nga problemahan.
