ILOILO CITY – Ginalantaw ni Iloilo City Mayor Jerry Treñas nga malakip sa mass testing sang syudad ang mga medical ukon health workers nga nagatrabaho sa ospital.
Ini matapos nga nagpasar sang resolution si Councilor Candice Tupas nga ilakip sa mass testing ang mga health workers amo man ang mga janitor kag gwardya nga naga trabaho sa ospital.
Sa interview sang Bombo Radyo kay Mayor Treñas, iya ginpahayag nga ang ospital na kuntani ang may katungdanan nga ipa-test ang ila mga empleyado apang iya man ini ginakonsidera kag handa ini nga istoryahan kaupod ang COVID-19 team.
Samtang may mga financial institution naman suno kay Mayor Trenas nga nagpakigbahin sang ila nga programa sa mga local government units sa Western Visayas agud nga makabulig sa kinahanglanon sang lugar sa pagtib-ong sang ekonomiya.
Kadungan sang pagbukas sang ekonomiya sa syudad, ginalantaw ni Mayor Treñas nga maggamit sang QR Code ang mga pumuluyo agud nga mangin mahapos ang contact tracing.
Pahayag sang alkalde, kinahanglan nga mangin handa ang syudad sa pagbukas sang ekonomiya.
Sa bahin naman sa isyu sang power outage sa syudad sang Iloilo, ginpahayag ni Mayor Treñas nga nahangpan sini kun ngaa nagaka-eksperyensyahan ini sang syudad bangud nagapatigayon sang preventive maintenance ang More Electric and Power Corporation.
Suno kay Treñas, kun indi paghimuon sang More Power ang preventive maintenance mahimo nga maglala pa ang problema sa kuryente.
