ILOILO CITY – Ginapangitaan na ni Iloilo City Mayor Jerry Treñas sang duta ang ginaduso nga pagpatukod sang public columbarium kag crematorium sa syudad sang Iloilo.
Sa interview sang Bombo Radyo kay Treñas, iya ginpahayag nga ginakinahanglan ang 1.5 hectares nga kalaparon sang duta agud nga mapatukod ang nasambit nga proyekto.
Suno kay Treñas, nagaginutok na ang mga pampubliko nga patyo samtang ang iban naman ang indi makasarang nga magpalubong sa mga private cemetery.
Ginpahayag ni Treñas nga sa subong, iya pa nga ginahikot ang pagpatigayon sang nasambit nga proyekto.
Samtang, ginahulat sa gihapon ni Treñas ang resulta sang pagtuon sang Metropolitan Manila Development Authority tuhoy sa traffic situation sa syudad sang Iloilo.
Suno kay Treñas, kun makahatag sang rekomendasyon ang nasambit nga ahensya, mahapos na lang ang iya nga pagplastar sang development kun tuhoy sa dalagan sang trapiko ang pagahambalan.
Sa subong suno sa alkalde, gina amat-amat lang ang pag-deputize sa mga force multiplier nga amo ang magapatuman sang mga ordinansa sa syudad kasubong sang pagpanakop sa mga traffic violator, illegal parking kag mga nagalapas sa Anti-Littering.
May kaangtanan naman sa mga obstruction sa Brgy. Railway sa La Paz, ginpahayag sang natungdan nga iya ipatawag si Task Force on Moral and Values Formation Head Nestor Canong.
Ini ang may kaangtanan sa pagpakatig-a ni Canong nga gub-on ang posyon sang iya balay nga ginapahayag nagalaksam sa dalan.
Ginpahayag ni Treñas nga ginatun-an pa sang City Legal Office kun ano ang legal remedy tuhoy sa ginatindugan sang balay ni Canong nga ginapanag-iyahan sang Panay Railways nga isa ka pribado nga kompaniya.
